الهی اویانیش ـ مارش MARŞ ـ İLAHİ OYANIŞ

«میصیر»، «لیبی»، «یمن»، «بحرین»، «حجاز»، «تونس» قاریشدی:

ـ «عرب»، «عجم»، ظلم الیندن هامّی گلدی فریادا

«امیر»، «سلطان»، «خوجا»، «پاشا» تاجِ تختی بیراخدی

یداللهِ فــوقَ ایــدی؛ ظاهر اولدی دونیادا
 

کفره غنیم، دینه دایاق، انقلابلار قوپدولار

تاپداق آلتیندا قالانلار، نجات یولون تاپدیلار

عدالتین بالتالاری، ظلوم کؤکون چاپدیلار

حقّ الله دان ایسته دیلر، اؤزو چاتدی امدادا
 

«صنعا» دان باشلاندی نهضت، بیتدی «تونس» ده کؤکو

داردا قالمیشلار اویاندی، پیتداشیب ظلمون یوکو

اوّل ـ آخر انقلابین ســرّ و اســراری بــو کــی :

... ـ جور و بیدادین الیندن گلدی انسانلار دادا
 

«مصر» ده گیزلین خودیک لر* چیخدی بیردن ظاهره

مؤمن اصلانلار دایاندی ، لطف حیّ «قاهره

«تحریر»ه مئیدان آچیلدی ، آزاد اولدی «قاهره»

قالدی «حسنی نامبارک»، گؤر نه عاجز، دونیادا

«لیبی» ده قانلی یوروش لر، «بن غازی» دن باشلاندی

«سرهنگ» اؤزون داردا گؤردو، قان گؤیلره داشلاندی

«طرابلس»دا ظفرلرین خنجرلری قاشلاندی

«قذّافی»نین جنازه سی قالدی ویلان اورتادا

«وهّابیّت» قورقوسوندان سارسیلیب خلقِ حجاز

گون چیخان قانلی «قطیف»دن باشلانیبدیر اعتراض

«طائف»ین قومی قوچاقدیر، انقلابی بوشلاماز

دولتِ «آلِ سعود»دا آز قالیر گئتسین بادا

لاله قانلاردان بویاندی، چون «منامه» یا حسین(ع)

قهر ائدیب «آلِ خلیفه» بو مرامه یا حسین(ع)

سؤیکه نیب «بحرین»، اون ایکی حق امامه یا حسین(ع)

شیعه نین قانی سالیبدیر لرزه جانی جلّادا
 

«جعفری» وئردی نداسین، ذکرِ یا ابن العسکری

«ساری تئل»** ین عاشیق لاری جعفری نین یاوری

قیلدی ازبر ماهنی لارین «آذربایجان» ائل لری

ساری تئلین یوخدی مثلی گزسن دوزِ دونیادا

................................

* خوديک = غم ، غصّه

** ساري تئل = تبريزده مدنيِّت خادمي افشــار تخلّص ائدن استاد رضــا افشــارپــورون باشچيليغي ايله ائله همين شهرده ۱۳۷۲ ـ نجي ايلده يارانميش بير عاشيق ارکستري.

بو ارکسترين عضولري ايران دا ايلک بيمه اولموش هنرمندلرديرلر.همين ارکستر فعاليته باشلاياندا، من ده اونون فخري شاعيري و مصلحتچي سي اولماغي ممنونيّت و فخرله قبول ائتميشم. (بو حقده گله جک ده تفصيلاتلي معلومات وئريله جک).