باهاردل

اگشه باد باهار، عطر گل ز تورنه هات
ب دلم تش ایزنه ،غمزه و ناز تیات

رم ادم اسبته که، برسم به دیدنت
گل برقص و گل بخون ،جونمه خندیدنت

چ کنم ،چ زم ایا ،ک شکارم کردیه
هم خوشم ،هم ناخوشم،عاشقی بد دردیه

ایزنه ساز و دهل ،چل اگرن ایل و مال
دستومه تار اکنم ،تا برسی تیه کال

مث بارون ایبره ،رنگ تحلی از ورم
تا صدات ب گوشمه ،سی همه دنیا کرم

تو که گرمه نفست ،بکن اوو برف دلم
غیر تو نیخوم که بو،مین دنیا حاصلم
#میترا
ستینم تا ب کی تک وا بمونم
تو دیر از مو ،مونم تهنا بمونم

پسین ،وقتی اخونم پا تش نار
کجا بختم ،کجایم مو،کجا یار؟

خدا، روزی فلک سی مو اگرده؟
که بی تو روزگارم پر زدرده

ابره جون ز زونیم تا ابازی
دهدر ،دینم به نات ،چه تش بلازی

باهار پشت باهاره ار بیایی
تو هم درمون دردی ،هم بلایی

#میتراکیانی

بگو دایا ،هنی دلشوره داری؟
هنی دلواپس ،ای روزگاری؟

تیا کالت ب گلگشت بهشته؟
ب بالینت پرقو یا که خشته؟

دلم تنگه که خندم وا تم دل
ب اوو چشمه شورم ماتم دل

به تورنه بسته مینا او میاته
عوض کن جون خوت رخت سیاته

هنی لالائیات ونگه ب گوشم
چو سیر و سرکه از ویرت اجوشم

بکو دایا حلالم هر چ بیده
غمت کل وجودم انجنیده

تو بهتر دونی از ای حال زارم
حلالم کو ،حلالم کو ،حلالم

#میتراکیانی

د‌‌در کار دلم گیره ب دستت
بقربون تیا شهلای مستت

ب ساحل پا خیالت ار نشینم
ب موجی ابری دنیا و دینم

ب زخمم داغ تو چی استخونه
ب جا مرهم زوونت نیش جونه

همو شووا ک نیدی فکر حالم
خدا دونا ک نیری از خیالم

همو وقتی ک ایخندی ب مستی
اده دنیا نشونم ضرب شستی

جوونی رهدو وا عشق تو پیرم
از عشقت جون اگرم یا امیرم

#میتراکیانی