طنز محکریم

شعر لری 
مَحکریم کَر بی و کَر وابی خرش
همسَرش بَهسی وبَهسَه بی سَرش
 پِسَرِش باقر و قر بی پَ-سرش
دووَرش پَلور و پَل بی دو وَرِش****
مّحکریم یواشکی شات شیت ایکه
دبسو و بی خووی  مِن جا پیت ایکه
باقرو  درختله رات و ریت ایکه
پَلور سر تپ تپی دَس مِن نیت ایکه
****

دَبسو  پیل ایسه بَی تَزبه فالش 
مَحکریم پیل اینها و زِر شالِش
باقرو وَلم بِکِردی ایزه و چالِش
پَلورو گّپوتَره وَ سِند و سالِش
****
مَحکریم بعضی وقتل گَهپَلَه نیشنُفت 
دَبسو ماهی یبار جایله نی رُفت 
باقرو صبح تاپسین دَس مِن نُفتِ 
پَلورو خجالتی نِخُونِشَه ایکُخت 
****
حالشون خانوادگی وتَه نخش بی
مَحکریم گُر ایگرو و سر تش بی
دَبسو انگاری کِه چُت مِن تیش بی
همیشه دم هُونَشو زنجیله کَش بی
****

مَحکریم دَس پاچه بی پیله وَلا کِرد
دبسو وَ دلخوشی میخک وَنا کِرد
باقرو زَهلَه تِرو کفشل وَپا کِرد
پلورو کهنه شَه دِرد سرشَه وَتا کِرد

****

مَحکریم کُرفَلَه گُه دَسَلَه غِردا
دّبسو حَقه نَه دِرد جُومَه نه شِر دا

وریسا  وّداغِ دِل خاگَلَه وِردا
سَگَلَم بَی هَپَ هَپ بَچیلَه دِردا
****

مَحکریم و گِرَدَمُس وَ زن وَریسا
دَبسو یه لیکه بِی مِن مال نویسا
باقرو دندونلِش سَر یَک نییسا
بی پلو سیکیَه لِش وَتَه نییسا
****

هر زَمُون  مِن هونشو جَر شِرو  ویبی
محکریم  یدفه ای مَحکَرو  ویبی
دَبسو  پشت سرش مُچ و کِرو  ویبی
باقرو مردفکی  میش  مُرو  ویبی
****
شَو کِه وابی مَحکریم بچیله وَخَو کِه
چِفتَه واز کِه دَس پُلو و مِن هِلَو کِه
پانَه پیچ دا پایَلَه  مِثلِ دُو لَو کِه
خِنَه جُمنا انگاری مِن چاله اَو کِه
****
صُب که وابی دَرف دولَل لِهسَه وابی
 مَحکریمم  چی برنجِ شَهسَه وابی
 دّبسو انگار بَنی وَربَهسَه وابی
بچیل چی بَرد مِن شُل بِهسَه وابی
***** 
باقرو هوشش نبی هی مُفکه ایزه
دبسو هُرتش ایره وَش لُرکه ایزه
وش ایگو ای جونمرگ مَ خیل وَ رو یَه
نیبنی مِن رختخو بَوتون وَ خویه؟