بو ((غم منظومه سی )) بیر واقعی کدرلی باش وئریش اوچون نظمه چکیلیب .
بوتون اوخوجولاردان کدرلنمک اوچون عذر ایسته ییرم.شان گون لریز و خوش چاغ لارییز اولسون
(( غم منظومه سی ))
گئدیم گزییم یا رب داهی هارانی
نجور دییم او غملی ماجرانی
گلین گورون سینه مده کی یارانی
قرخ ایل اولار هرگئجه نی آغلارام
اورکیمیه کوز قویارام داغلارام
قولاق وئرین سوزو دییم ازلدن
سئچیلمه رم یئره دوشن خزلدن
راوی دئمیر بو سوزلری غزلدن
بلکه قلم ناله چکیب آغلاییر
شاعر اونو دفترینه باغلاییر
کندیمیزده ساده لیک له یاشاردیق
چول ایشینی گورنده باغلاشاردیق
صفالی بیر بولاق کیمی داشاردیق
بولمه زیدیخ دره ندیر دوز ندیر
قاش لار داکی آغیز ندیر سوز ندیر
گئینمنی ال دن آلیب گییردیق
سخسی قابین شورباسینی ییردیق
گئجه چاغی شیرین ناغیل دییردیق
باخمازیدیق خاتون لارا قیزلارا
تکجه باخاردیق گئجه اولدوزلارا
بایرام چاغی دام اوستونه چیخاردیق
شال ساللیب جویز بادام یغاردیق
شوخلوقونان بیربیرینی یخاردیق
شان لیگیمیز گونده حدن آشیردی
گاه دیلیمیز دانشمادان چاشیردی
یاواش یاواش بوی بوخونا دولوردوم
گئدیقجه بیر تازه جوان اولوردوم
نه آخشاملار گونش کیمی سولوردوم
نه ده منی کند ایشلری یوراردی
نه ده بیری قولاقیمی بوراردی
هوس لنیب بیر چرخ آلدیم شهردن
بلکه گزئم ائل اوبامی سحردن
سوزون دوزی سورن مئدیم یهردن
سونرا داهی چرخ مینمگه داداندیم
گاه دولانیب گاه یول لاردا یوباندیم
چرخی سوروب ائودن اوزاخلاشاردیم
اوز تای لاریم گلنده باغلاشاردیم
آغاج لارا چیخاندا دیرماشاردیم
جوانلیقین شوری منی توتوردی
ناقّا کیمی هردن منی اوتوردی
آخشام چاغی کدّه قدم آتاردیم
خیالیمدا آرزولارا چاتاردیم
هئچ بیلمه سیز نئجه راحات یاتاردیم
یاتمامیشدان ساعتیمی قوراردیم
سحر چاغی ناماز اوچون دوراردیم
ننه م دوروب بیر آز خمیر سالاردی
ماش نخودی سئچردی ایسلاداردی
ایینک لری ساغیب قاتیق چالاردی
صبحانه یه بال قیماقی ییردیم
بیر گون سحر سوقابلارین گوتوردوم
قیزلار گئدن بولاق اوسته یئتیردیم
سو دولدوروب ائوه طرف گتیردیم
یولادا گوردوم *نگار* منه چوخ باخیر
او باخدیقجا اورگیمده قان آخیر
من باخاندا او گوزلرین سوزوردی
سانکی او لحظه قلبیمی اوزوردی
عمّه قیزیم دوداق لارین بوزوردی
سوزون دوزی حیا ائدیب اوتاندیم
یانار اودون کناریندا دایاندیم
او بیر باخیش اولدو منه دردسر
قلبیمه قویدو نئچه یوز مین اثر
کیم بو سوزو خیردالیار کیم کسئر
بیرده دونوب باخدیم او مه پاره یه
باخدی اودا من اورگی یاره یه
گوزلریمه باخماق همان گوله ردی
محبتی آرامیزدا بوله ردی
اورگیمین سوزلرینی بولردی
دیینمئدیم گل باری بیر یانیما
اود ووروسان گونده منیم جانیما
مجنون سایاق او لیلی یه وورولدوم
آخار سو تک دولاندیقجا دورولدوم
محبتین باده سیله قورولدوم
عهد ائله دیم ایلقاریمی دانمیام
اوزگه دیین سوزلره آلدانمیام
باخیشلاری مرواری تک دوزوردی
خیالیمدا بالیق کیمی اوزوردی
بالدان شیرین صحبت لری سوزوردی
گاهدان گاها ایلدیرم تک شاخیردی
گاه تئلینه غنچالی گول تاخیردی
باخیش لاری سالدی منی ایاقدان
عمروم کئچدی تل لر کیمی داراخدان
کسیلدیم بیر آغاج سایاق بوداقدان
اوندا گوردوم هوشوم چیخیر باشیمدان
تر توکولور آنلیمدان گوز قاشیمدان
بیر گون نگار گلدی بیزیم باغچایا
نشان قویدو دیوارداکی تاقچایا
گوزوم دوشدو الینده فیندقچایا
وورولدوم او حنا قویان ال لره
الینده کی غنچالارا گول لره
محبت لی گون کئچیب آی اولدو
آی لاریمیز بیر بیرینه تای اولدو
بیر ایل باخیش تکجه منه پای اولدو
دئدیم بلکه بختیم او ایل اویاندی
هئچ بیلمه دیم دوردوغوم یئر هایاندی
بیر بیرینه عاشقی کیمی جان دئدیخ
جانیمیزی بیربیره قربان دئدیخ
وعده میزه آند اولا قران دئدیخ
علاقه لر اورک لرده داشیردی
گورمک همان اورک راحات لاشیردی
باغ یولوندا هردن گئدیب گزیردیم
گئتمه میشدن باش گوزومو بزیردیم
قارشی چیخان رقیبلری ازیردیم
مجنون کیمی سالدی منی چول لره
او لیلیه خاطیر دوشدوم گول لره
هر ایکی میز چراغ کیمی یانیردیق
اورگ سوزون دانیشمامیش قانیردیق
اوشاقلیقدان بیربیرینی تانیردیق
مزاح اوچون باغلاردا گیزلنیردک
گاهدان ایتیپ گاهدان دا گورسنیردیک
جمعه گونو کدّن اوزاخلاشاردیق
شوقا گلیب قاینیاردیق داشاردیق
بیر مثل وار سوت گولونده یاشاردیق
چوخ ایسته دیم توتام اونون الیندن
بیر ائشیدم دادلی سوزو دیلیندن
قورخمازیدیق چولده اولان خطردن
نگار آدین سسلییردیم بتردن
تانری بیزی سالمییادی نظردن
بیر گون گئدیب داغ باشیندا آغلادیق
تازه ایلقار بیر بیرینه باغلادیق
آرزولاردیق دئم لر دولا بوغدایا
بیزده گئدک دولدوراق تایدان تایا
وار برکت بوغدادا گلمز سایا
سونبول لری دسته دسته بیچردیک
ردیف لری آتدیم لییب کئچیردیک
خرمن اوسته اوزاناردیم یاتاردیم
بیچین لری بیربیرینه قاتاردیم
چیلتیک داشی نگار اوچون آتاردیم
او دا منه بیر کاسا سو وئرردی
ساچ لارینی تومارلییب هورردی
صحبت اوچون گاهدان داغا گئدردیک
گاه یاخینا گاه اوزاغا گئدردیک
اولسایدی هر یئرده زاغا گئدردیک
هردن علی *پنجه سی *نه چیخاردیق
آرزولاری بیربیر اوسته یغاردیق
یایدا اوزوم تورشا شیرین اولاندا
سیغیرچین لار باغچالارا دولاندا
آخشام چاغی گونون رنگی سولاندا
باغ یولوندا آخار سو تک آخاردیم
دووار اوستن قوزاناردیم باخاردیم
قرار اوچون باغا نشان سالاردیم
باغ یولوندا انتظارا قالاردیم
جوابیمی آخشاماجان آلاردیم
دییردی گئت او دالداکی باغچایا
سندن اوتور پای قویموشام تاقچایا
منیم اوچون بویوک بیر افتخاردی
نگار منه دام اوستوندن باخاردی
اورگیمی یاندراردی یاخاردی
اوندا بیزی یولدان کئچن گورئردی
اوز اوزونه بو ایشلره گولردی
بیرگون آخشام اوچ دورد نفر کدّی لر
نگار اوچون تازه خبر گئتدیلر
هیچ بولمه دیم نمننی اورگئدیلر
محبّتین پله کانی ییخیلدی
سانکی بوغاز داردا قالیب سیخیلدی
صاباح گئدیب باغ یولوندا دایاندیم
قاش قارالدی به وقت اولدو یوباندیم
گئجه چاغی بیر لحظه ده اویاندیم
گوردوم باخیر گوی اوزوندن آی منه
گئجه چاغی ایشیق وئریر پای منه
من او گئجه صبحه کیمی یاتمادیم
آخی ندن مرادیما چاتمادیم
مگر اونا فیشقراقی آتمادیم ؟
آنجاق منی سالدی غمه غصه یه
ایشیم دونوب کدر لی بیر قصه یه
بیرده گونوز گئدیم گورم گلمه دی
فیشقراقی ائشیدمه دی بولمه دی
اوندان بئله هیچ وقت اوزو گولمه دی
بولمه دیم کی نگار نئیی آنلییب
یا کیم گئدیب بیزلری شیطانلیب
دئمه ننه م کدّه چیخیب منبره
پیام وئریب خال اوغلوسی قنبره
صاباح گلین ائلچی گئدک عنبره
اوغلومو ائولندیریرم آی باشی
آز قالیری ییرمیه دولسون یاشی
قنبر اونا اوزوک آلیب گتیردی
گون باتاندا تز ننه مه یئتیردی
اونا گوره نگار منی ایتیردی
اورگ اولدی بو ایشلردن یارالی
فلک سالدی بیربیریندن ارالی
نگار داهی گورسنمه دی سحردن
دق ائله دی بو غصّّّه دن قهردن
خبر گلدی آخشام چاغی شهردن
نگار خانیم خسته دوشوب یاتیبدی
حکیم دئیب چوخلی داوا آتیبدی
دئمه او قیز قصد ائلییب جانینا
جزیق چکیب عهدینه پیمانینا
هیچ کیمسه نی قویمور گئده یانینا
خبر گلدی سحر او یولداشیندان
اجل قوشو واز کئچیبدیر باشیندان
قرخ ایل دیر کی او ایشلره حیرانام
مجنون سایاق داغلاردا سرگردانام
منده گرک غم ایچینده قوی لانام
بیر عومرودور اورکده دیر سوزلریم
باغ یولونا قیفیل لانیب گوزلریم
ایندی نه باغ وار نه ده بوغان قیزی
خاطره لر آغلادیر هردن بیزی
باغ یولونو گرک گئدم دیز دیزی
گوز یاشینی او قدر توکم ایسلانام
او دیوارین توپراغیندا قوی لانام
یادیمدادی گوزلریمه باخاندا
آغ گول لری ساچلارینا تاخاندا
محبتی ایلدیرم تک شاخاندا
باغلانیردیم او ذیل قارا تئل لره
اونا گوره دوشموشم هی چول لره
گول دوزئلیر هر گئجه گوز یاشیمدان
اونا گوره هوشوم چیخیر باشیمدان
ایسته میشم او شاعر یولداشیمدان
بو غصه نی نظمه چکیب باغلاسین
هی اوخوسون اورگیمی داغلاسین
حقیقت دیر بو سوزلرده یالان یوخ
منیم کیمی اوز باشینا چالان یوخ
بو سوزلری یوخسا مندن آلان یوخ
اورگیمده بو غم یئکه داغ اولدی
دنیا منه ویرانه بیر باغ اولدی
گلین داهی ایلقارلاری دانمیاق
وسوسه لی سوزلره آلدانمیاق
کئچن گونون حسرتینه یانمیاق
سیلمک اولماز اورکلردن غصّه نی
کدر توتور بو غصّه لی قصّه نی
حزین سوزو حزین آدام بولمه سین
بو دردیمی پارچالیب بولمه سین
بو *درویش* ین باهالی هر جمله سین
یازدیم قالا خاطره لر باغیندا
شعر ائله دیم , گئجه خلوت چاغیندا
*************
1390 ارومیه
ارسال پیام خصوصی اشتراک گذاری :
|
|
|
|
| 
سیاوش آزاد
محمدرضا آزادبخت
سید هادی محمدی
جمیله عجم(بانوی واژه ها) 
بانام ویادخدا ودرودبرشما 
فرامرز عبداله پور 
